ပိုက်ကြီးဆွဲသူများ

ပန်းမှော်စွန်း

မြန်မာနိုင်ငံသည် ရှည်လျားသော ပင်လယ်ကမ်းခြေနှင့် မြစ်ချောင်းအင်းအိုင် ပေါများသောဒေသကို ပိုင်ဆိုင်ထားသည် ဖြစ်သောကြောင့် ရေချိုရေငန်ငါးဖမ်းလုပ်ငန်း ဖွံ့ဖြိုးတိုးတက်သောနိုင်ငံဖြစ်သည်။ ထူထပ်များပြားလာသောလူဦးရေနှင့် ကိုက်ညီအောင် နည်းစနစ်ပေါင်းများစွာသုံး၍ ငါးဖမ်းလုပ်ငန်းကို လုပ်ကိုင်ဆောင်ရွက်ကြသည်ကိုတွေ့ရှိရသည်။ တနိုင်တပိုင်ရှာဖွေလုပ်ကိုင်မှုများရှိသလို အရင်းအနှီးများစွာစိုက်ထုတ်ပြီး စီးပွါးဖြစ်ဆောင်ရွက်ကြခြင်းများလည်းရှိသည်။

ပိုက်ကြီးဆွဲခြင်းလုပ်ငန်းသည် ပုံမှန်အားဖြင့် ငါးအုပ်ကိုပိုက်ဖြင့်ဝိုင်းပတ်၍ ကမ်းနားသို့လူအင်အားဖြင့်ဆွဲတင်ယူခြင်းဖြစ်ပါသည်။ နောက်ပိုင်းတွင် များပြားလာသောစားသုံးသူ နှင့် ရှားပါးလာသောငါးများကြောင့် နည်းလမ်းသစ် ကိရိယာသစ်များကိုသုံးကာ ရှာဖွေလုပ်ကိုင် လာကြရသည်။ ကမ်းရိုးတန်းဒေသများ အထူးသဖြင့် ရခိုင်ကမ်းခြေဒေသတွင် ရေထဲမှငါးကိုမီးဖြင့်မျှားကာ ပိုက်ဖြင့် ဖမ်းသည့်နည်းကို  အသုံးပြုနေကြသည်ဟုသိရပါသည်။  ငါးမျှားဂျိတ်တွင် အစာတပ်ကာရေထဲမှငါးကိုဆွဲယူရသည်ကဲ့သို့ မီးမမြင်ဖူးသောငါးကို မီးရောင်ပြကာ ဖမ်းယူသည့်နည်းစနစ်ဖြစ်သည်။ ညအခါပင်လယ်ထွက်သည့်ပိုက်သမားများသည် ရေပြင်ကိုဓါတ်မီးဖြင့်ကြာမြင့်စွာထိုးထားမိရာ မီးရောင် ကျနေသောနေရာတွင် ငါးများထူထပ်စွာရောက်လာသည်ကို မြင်တွေ့ရာမှ မီးဖြင့်မျှား၍ဖမ်းရသည့် ငါးဖမ်းနည်း ပေါ်ပေါက်လာသည်ဟု သိရှိရသည်။  ယင်းလုပ်ငန်းသည် ညအချိန်တွင်သာလုပ်ကိုင်ရခြင်းကြောင့် ကရိကထများသည်။ သတိဝိရိယကြီးစွာဖြင့် လုပ်ကိုင်ဆောင်ရွက် ရသည်။ ပင်လယ်ကမ်းနားတွင် အဆောက်အဦးကို ယာယီ တည်ဆောက်ပြီး လုပ်သားများနေထိုင်ကာ ငါးဖမ်းလုပ်ငန်းကို လုပ်ကိုင်ရ သော်လည်း ယင်းတို့၏ဖွဲ့စည်းပုံမှာ စက်ရုံများ၊ အလုပ်ရုံများ၊ ကုမ်္ပဏီများကဲ့သို့ များစွာအစီအစဉ်ကျလှသည်ကို တွေ့မြင်ရသည်။   လူအင်အား၊ စက်၊ လှေ၊ အရင်းအနှီး၊ ကျွမ်းကျင်မှု၊ အတွေ့အကြုံ၊ စီမံ ခန့်ခွဲနိုင်မှု များစွာ ပါဝင်ကာ ပိုက်လှေခေါင်းဆောင်၊ လှေဦးစီး၊ စက်ဆရာ၊ မီးလှေဆရာ၊ ပိုက်ဆရာ၊ လုပ်သား၊ အလုပ်သမ စသည်ဖြင့် စနစ်တကျဖွဲ့စည်းလုပ်ကိုင်ရသည့် ပင်လယ်ငါးဖမ်းလုပ်ငန်းဖြစ်သည်။ သာမန်ငါးဖမ်းနည်းများထက် အနည်းငယ်ဆန်းပြီး စိတ်ဝင်စားဖွယ်ကောင်းသည့် ပင်လယ်ကမ်းမှ မီးဖြင့်မျှားယူဖမ်းဆီးရသည့် ပိုက်ကြီးဆွဲ လုပ်ငန်းအကြောင်းကို လေ့လာတင်ပြပေးလိုက်ပါသည်။

ပိုက်ကြီးတဲ

          ပိုက်အလက်ပေါင်းများစွာဆက်စပ်တွဲချုပ်လျက် လူအင်အားဖြင့်ဝိုင်းဖွဲ့လုပ်ကိုင်ရသော လုပ်ငန်းဖြစ်သောကြောင့် လုပ်သားများ နေထိုင်နိုင်ရန် ခိုင်ခန့်ကြီးမားသောတဲများကို တည်ဆောက်ကြရသည်။ ပင်လယ်ကမ်းနားတွင်တွေ့မြင်ရပြီး ပိုက်ကြီးတဲ ဟု ခေါ်ဝေါ်ကြသည်။ ပိုက်ကြီးဆွဲခြင်းလုပ်ငန်းကိုအချို့က ၀ိုင်းပိုက်ဆွဲခြင်းဟုလည်းခေါ်ကြသည်။ ပိုက်ကြီးဆွဲရာတွင် တစ်ဦးတည်းပိုင်လုပ်ငန်း နှင့် အစုစပ်ပိုင် လုပ်ငန်းဟူ၍ နှစ်မျိုးရှိသည်။ အသုံးပြုရမည့်ပိုက်တစ်ဖောင်၏တန်ဖိုးမှာ သိန်းတစ်ရာ့ရှစ်ဆယ်မှသိန်းနှစ်ရာ ၀န်းကျင်ရှိပြီး လေးနှစ်ကျော် ငါးနှစ်ခန့် အသုံးပြု၍ရသည်ဟုသိရသည်။ လုပ်ငန်းတွင်အသုံးပြုရသည့်ပိုက်သည် အလျားလက်တောင် ၆၀၀၊ အနံလက်တောင် ၁၇၀၊ အကျယ် ငါးမူးကွင်းရှိစေရန် ပိုက်အလက်ကလေးများကိုဆက်စပ်လုပ်ကိုင်ရခြင်းဖြစ်သည်။ ပိုက်လှေကိုပုံမှန်အားဖြင့် အရှည်ပေသုံးဆယ်၊ အကျယ်ရှစ်ပေ နှင့် ဇောက်(အမြင့်) ခြောက်ပေခန့်ရှိရန် တည်ဆောက်လုပ်ကိုင်ရသည်။ ပိုက်လှေတန်ဖိုးမှာ သိန်းလေးဆယ်ဝန်းကျင်ခန့်ရှိပြီး ပိန်္နဲသား၊ ပျဉ်းကတိုးသားများဖြင့် အများဆုံး လုပ်ကိုင်ကြသည်ကိုတွေ့ရသည်။ မီးလှေအတွက် ၂၅ ကောင်မီးစက်နှစ်လုံး၊ ဒိုင်နမို ၁၀ ကီလိုတစ်လုံး၊ ဆလိုက်မီးသီး အလုံးလေးဆယ် နီးပါး တပ်ဆင်ထားရပြီး လှေမှာ ပေ ၂၀ ခန့်ရှိရမည်ဖြစ်သည်။ မီးလှေတန်ဖိုးမှာလည်း ပိုက်လှေကဲ့သို့ပင် သိန်းလေးဆယ်ခန့်ရှိသည်။ ၀န်ထမ်းအင်အား  ၂၀ မှ ၃၀ ကျော် ငှားရမ်းလုပ်ကိုင်ရပြီး အချို့ပိုက်တဲ များတွင် ၅၀ မှ ၁၀၀ အတွင်းရှိသည်ကိုတွေ့ရသည်။ ငွေအရင်းအနှီး စိုက်ထုတ်နိုင်မှုအပေါ်မူတည်၍ ပိုက်၊ လှေ၊ လုပ်သားအင်အား ကွဲပြားသွားသည်။ လုပ်သားများကို လစာဖြင့် ငှားရမ်း ထားခြင်းရှိသလို၊ ရရှိလာသောကုန်ပေါ်တွင် အချိုးကျခံစားစေခြင်းဟူ၍ရှိသည်။ များသောအားဖြင့် ပိုက်ကြီးတဲလုပ်သားများသည် လစာဖြင့်လုပ်ကိုင်ကြခြင်းမရှိကြဘဲ လုပ်ငန်းသိမ်းမှသာ ရရှိသောကုန်ပေါ်တွင် တန်ဖိုးသတ်မှတ်ထားသည့် ငွေကြေးအား ရယူကြသည်ကို တွေ့ရသည်။  ရှာဖွေရရှိလာသောကုန်၏ထက်ဝက်ကို ပိုင်ရှင်မှယူပြီးကျန်ထက်ဝက်ကို လုပ်သားများက အညီအမျှခွဲဝေယူကြခြင်းဖြစ်သည်။ လစာဖြင့်ယူမည်ဆိုပါက တစ်လလျှင်စရိတ်ငြိမ်း ငါးသောင်းမှခြောက်သောင်းအတွင်းရရှိ်ကြသည်။ လစာသမားများသည် လုပ်ငန်းအောင်မြင်သည်ဖြစ်စေ ဆုံးရှုံးသည်ဖြစ်စေ သူတို့နှင့်မဆိုင်ဘဲ လုပ်ခလစာရရှိနိုင်သော်လည်း လစာနှင့် မလုပ်သူများအဖို့ မိမိတို့ကြိုးစားမှုနှင့် ကံတရား အပေါ်မူတည်၍ ခံစားရခြင်းဖြစ်သည်ကိုတွေ့ရသည်။ အမျိုးသားလုပ်သားများ အပြင် ငါးလှမ်း၊ ငါးရုတ်နှင့် လုပ်သားများစားသောက်ရန် ထမင်းဟင်းချက်သည့်အမျိုးသမီးများကိုပါ ငှားရမ်းကြရပြီး ပိုက်ကြီးတဲတစ်ခုတွင် အမျိုးသမီး ၁၀ ဦးမှ အယောက် ၃၀ အထိ ငှားရမ်းလုပ်ကိုင်ကြရသည်။ အမျိုးသမီးလုပ်သားများမှာ ကုန်းပေါ်တွင်သာ လုပ်ကိုင်ရသည် ဖြစ်၍ လုပ်ခလစာငွေကိုသာရယူနိုင်ကြသည်။ ကျွမ်းကျင်မှုလုပ်ကိုင်နိုင်မှုပေါ်မူတည်၍ စရိတ်ငြိမ်း ၃၀၀၀၀ မှ ၄၀၀၀၀ အတွင်းရရှိကြ သည်ကို တွေ့ရသည်။ ပင်လယ်သည်မာယာများသည်ဖြစ်သောကြောင့် ကျိန်းသေပေါက်အတိအကျပြောမရသည့် ပိုက်ကြီးဆွဲ လုပ်ငန်း၏ အကျိုးအမြတ်သည် ပြောရခက်လှသည်။ ပျှမ်းမျှအားဖြင့်တစ်ရာသီတွင် ကုန်ပိဿာချိန် နှစ်သောင်းကျော်ရသည်ဟုသိရသည်။ အချို့နှစ် များတွင်လည်း ငါးသောင်းနီးပါးရတတ်ကြသည်။   တစ်နှစ်တစ်ရာသီတည်းနှင့် အကျိုးအမြတ်များစွာ ဖြစ်ထွန်းကာ ပိုက်လှေတစ်စီးမှ နှစ်စီး သုံးစီး၊ ပိုက်တစ်ဖောင်မှနှစ်ဖောင်၊ လုပ်သားငါးဆယ်မှတစ်ရာကျော် စသည်ဖြင့် တစ်ဆမှနှစ်ဆသုံးဆ တိုးပွါးဖြစ်ထွန်း သွားသူများ ရှိကြသည်။ အချို့ကမူ ရာသီမဆုံးမီကပင် တပ်ပျက်ကာ လုပ်ငန်းသိမ်းရပြီး နလံမထူနိုင်သည့် အခြေအနေ ရောက်သွားသည်လည်း ရှိသည်။  ပိုက်တဲတစ်ခု၏အောင်မြင်မှုသည် အလုပ်ရှင်၏ ငွေအင်အားစိုက်ထုတ်နိုင်မှု၊ လုပ်ငန်းကျွမ်းကျင်မှု၊ အကျိုးပေးမှုပေါ် များစွာမူတည်ပြီး ထို လုပ်ဆောင်ချက်များကို အကောင်အထည်ဖော်ပေးရန်နှင့် ၀န်ထမ်းများကိုအုပ်ချူပ်ထိန်းသိမ်းရန် အရည်အချင်းရှိသော ခေါင်းဆောင်တစ်ဦး လည်း အဓိက လိုအပ်သည်။ ထိုသူကို ပိုက်သူကြီး ဟု လည်းကောင်း ပိုက်ခေါင်းဆောင်ဟုလည်းကောင်း ခေါ်ဝေါ်ကြသည်။

ပိုက်ခေါင်းဆောင်

ပိုက်အဖွဲ့တစ်ခုလုံး၏အဆိုးအကောင်းကို တာဝန်ခံနိုင်၍ ပင်လယ်အတွေ့အကြုံ၊ လုပ်ငန်းအတွေ့အကြုံများပြီး စိတ်ချယုံကြည် ရသည့်လူမျိုးကို ခေါင်းဆောင်နေရာပေးကာ လုပ်ကိုင်ဆောင်ရွက်ရသည်။ ခေါင်းဆောင်သည် လုပ်ငန်းစဉ်အတွင်း ထိခိုက်ဆုံးရှုံးမှုများ အတွက် တာဝန်ခံဖြေရှင်းရသောကြောင့် တာဝန်ကြီးသည်။ အလျော်အစားကြီးသည့်အလုပ်ကိုလုပ်ရသူဖြစ်သောကြောင့် ရရှိလာသော အကျိုးအမြတ်ကိုလည်း အခြားသူများထက်ပိုမိုခံစားခွင့်ရှိသည်။ ကုန်တန်ဖိုး၏ ၁၅% မှ ၂၀% အထိ ရရှိသူဖြစ်သဖြင့် ၀င်ငွေကောင်းသူ ဖြစ်သည်။ လှေထမ်း၊  ငါးထမ်း၊ ပိုက်သိမ်း စသည့် လုပ်ငန်းတာဝန်များကို ညွှန်ကြားပြသရုံသာတာဝန်ယူရပြီး ကိုယ်တိုင်ဝင်ရောက် လုပ်ကိုင် စရာမလိုပေ။   သို့သော် ပင်လယ်ကျား ဟု တင်စားရလောက်အောင် လုပ်ငန်းအတွေ့အကြုံ၊ ပင်လယ်အတွေ့အကြုံ ပြည့်ဝနေဖို့တော့ လိုသည်။ ပိုက်ဆွဲသည့် လုပ်ငန်းတစ်ခုလုံးတွင် ပါဝင်သော ပိုက်ပြင်၊ ပိုက်ဖာ၊ ပိုက်ဆွဲ၊ ပိုက်ဆက်၊ ပိုက်လျှော်၊ ပိုက်သိမ်း စသည့် လုပ်ငန်း အဆင့်ဆင့်အားလုံးကို တစ်ခုမကျန်နားလည်တတ်ကျွမ်းမှုရှိနေရမည် ဖြစ်သောကြောင့် ပိုက်ခေါင်းဆောင်တစ်ယောက်ဖြစ်ရန် လွယ်သည် တော့ မဟုတ်ပေ။ ငါးဖမ်းရန် ပိုက်လှေပင်လယ်သို့ထွက်သည့်အခါ ခေါင်းဆောင်သည် တက်မကိုင်၍လိုက်ပြီး လှေကိုထိန်းကျောင်းလေ့ ရှိသောကြောင့် သူ့ကိုိ ပဲ့စီးဟုလည်းခေါ်ကြသည်။ ပဲ့စီးသည်လုပ်သားများကဲ့သို့ပင် လုပ်ငန်းသိမ်းမှသာ လုပ်အားခငွေကိုထုတ်ယူခွင့် ရှိသည်။ ပိုက်ကြီးဆွဲသည့် ကာလမှာ တစ်နှစ် လျှင် ၇ လမှ ၈ လအတွင်း ရှိနေသောကြောင့် ငွေအသုံးလိုလျှင် ပိုင်ရှင်ထံမှကြိုတင်ငွေ ထုတ်ယူထားနိုင်ပြီး လုပ်ငန်းသိမ်းစာရင်းရှင်းသည့်အခါ စားစရိတ်နှင့်ကြိုတင်ငွေများကို ပြန်လည်ပေးအပ်ရသည်ကိုတွေ့ရသည်။ ပိုက်ကြီးဆွဲ သူများထဲတွင် ရာခိုင်နှုန်းအများဆုံးခံစားရပြီး တာဝန်အကြီးဆုံးသူမှာ ပဲ့စီးပိုက်ခေါင်းဆောင်ဖြစ်သည်။ ယင်းသူကဲ့သို့ပင် ရာခိုင်နှုန်းနှင့်ခံစား ရရှိသော စက်ဆရာ၊ ပိုက်ဆရာ၊ မီးဆရာ ဆိုသူများလည်းရှိသေးသည်။

စက်ဆရာ

စက်ဆရာသည် ပိုက်လှေတွင်တပ်ဆင်ထားသောစက်ကို မောင်းနှင်ပြုပြင်ထိန်းသိမ်းရန်  တာဝန်ယူရသည့်လူဖြစ်သည်။ လှေကို မောင်းနှင်ရန် တရုတ်နီ ၂၅ ကောင်အားစက်တစ်လုံးတပ်ဆင်ထားရပြီး စက်၏တန်ဖိုးမှာ လေးသိန်းမှငါးသိန်းအတွင်း ရှိသည်ဟု သိရသည်။ ပိုက်ထွက်သည့်အခါ လှေ၏ပဲ့တွင် စက်ကိုထိန်း၍လိုက်ပါရကာ   အကူအညီရရှိရန်အတွက် လုပ်သားများထဲမှစက်ဆရာဖြစ်ရန် အလား အလာရှိသော လူငယ်များကိုတပည့်မွေး၍ ပညာသင်ခိုင်းစေနိုင်ပြီး ပုံမှန်လုပ်အားခအပြင်ရရှိသည့်ကုန်၏ တစ်ရာခိုင်နှုန်း ခံစားခွင့်ရှိသည်။

ပိုက်ဆရာ  

ပိုက်အလက်ပေါင်းများစွာတွဲစပ်ထားသည့် ပိုက်ကြီးကို ပင်လယ်တွင်းသို့စနစ်တကျချ၍ငါးဖမ်းနိုင်ရန် ပိုက်ဆရာမှ တာဝန်ယူ ညွှန်ပြပေးရသည်။ ပိုက်ဆရာနှစ်ယောက်မှသုံးယောက်အထိ ပိုက်လှေတစ်စီးတွင်ပါဝင်သည်ကိုတွေ့ရသည်။ လုပ်ငန်းသိမ်း၍ ပိုက်များကို ပြုပြင်ဖာထေးခြင်းများ လုပ်ကိုင်ဆောင်ရွက်ရာတွင် ပိုက်ဆရာမှ အခြားလုပ်သားများကိုဦးစီးပြီး လုပ်ကိုင်ဆောင်ရွက်ပေးလေ့ရှိသည်။ ပိုက်ဆရာများသည် လုပ်အားခအပြင် ရှာဖွေရရှိလာသည့်ငါးတန်ဖိုး၏ နှစ်ရာခိုင်နှုန်းကိုပိုင်ဆိုင်ခံစားခွင့်ရသူများဖြစ်သည်။

မီးဆရာ

ပိုက်ကြီးဆွဲရာတွင် ကမ်းစပ်နားသို့ကပ်လာသောငါးများအား ပိုက်ဖြင့်ဝိုင်း၍ဖမ်းသည့်နည်းရှိသလို ရေအနက်တွင်ရှိနေသော ငါးအုပ်ကို မီးဖြင့်မျှား၍ဖမ်းခြင်းများ တီထွင်အသုံးပြုလာကြသည်ကိုတွေ့ရသည်။ ၎င်းင်းနည်းမှာ ညအမှောင်တွင်လုပ်ကိုင်ဆောင်ရွက်ရသည် ဖြစ်သောကြောင့် မီးစက်မောင်းရန်အတွက် လှေတစ်စီးထပ်မံလိုအပ်လာသည်။ ထိုလှေကိုထိန်းသိမ်းရန် မီးဆရာ (သို့) မီးလှေပဲ့စီး တစ်ယောက်ခန့်အပ်လုပ်ကိုင်လာကြရသည်။ မီးဆရာ၏အခန်းကဏ္ဍသည် ပိုက်ကြီးဆွဲလုပ်ငန်းတွင် များစွာအရေးပါသည်ဖြစ်သဖြင့် မီးလှေ ဆရာကို ရရှိသောကုန်၏ ၂% ခံစားခွင့်ပေးထားရခြင်းဖြစ်သည်။ ယင်းဆရာသုံးယောက်သည် အထွေထွေလုပ်သားများနည်းတူ လုပ်ငန်းများ လုပ်ကိုင်ဆောင်ရွက်ရသော်လည်း တာဝန်ယူရမှုမှာ အနည်းငယ်ပိုများသောကြောင့် ခံစားခွင့်ပိုရခြင်းဖြစ်သည်။ ယင်းတို့ကဲ့သို့ ခံစားခွင့် ရာခိုင်နှုန်း မရသော်လည်း ပဲ့စီးနည်းတူကျွမ်းကျင်မှုရှိသော လှေဦးစီးဆိုသူတစ်ဦးလည်း ပိုက်အဖွဲ့တွင်ရှိသေးသည်။

လှေဦးစီး

လှေဦးစီးဆိုသည်မှာ အရည်အချင်းရှိပြီး လုပ်သက်ရင့်သမ်္ဘာရင့်သည့်ပုဂိ်္ဂုလ်ဖြစ်သည်။ လှေဦးတွင်ထိုင်ပြီး ငါးအုပ်၏အခြေအနေ ရာသီဥတုအခြေအနေကို ခန့်မှန်းပေးရသည့်လူဖြစ်သည်။ သာမန်လုပ်သားများနှင့်တန်းတူ လုပ်ခရသော်လည်း လှေထမ်း၊ ပိုက်ထမ်းစသည့် ပင်ပန်းသည့်တာဝန်များမှ ကင်းလွတ်ခွင့်ရှိသည်ကိုတွေ့ရသည်။ အချို့ရေလုပ်ငန်းများ၊ ငါးဖမ်းလုပ်ငန်းများတွင် အဖွဲ့ခေါင်းဆောင်ကို လှေဦးစီး၊ လှေသူကြီးစသည်ဖြင့်လည်း ခေါ်ကြသည်ကိုတွေ့ရသည်။ ပိုက်ခေါင်းဆောင်သည် တစ်ခါတရံ လှေဦးတွင်လိုက်သည့်အခါ ဦးစီး လုပ်သူက ပဲ့တွင်ထိုင်လျက်တက်မကိုင်ပေးရသည်။ ပဲ့စီးခေါင်ဆောင်နီးနီး ပညာပြည့်ဝသည့်ပုဂ်္ဂိုလ်ဖြစ်သော်လည်း ပိုင်ရှင်၏စိတ်ချလက်ချ လွှဲအပ်ထားနိုင်လောက်အောင် ပြည့်စုံမှုမရှိသေးသဖြင့် ပဲ့စီးနေရာမရောက်ခြင်းဖြစ်သည်။ ပဲ့စီးသည် ပင်လယ်အတွေ့အကြုံ ကြွယ်ဝရမည့် အပြင် ပိုက်ကြီးတဲတစ်ခုလုံးကို အုပ်ချုပ်ထိန်းသိမ်းနိုင်စွမ်းနှင့် အကျင့်စာရိတ်္တပိုင်းဆိုင်ရာများတွင်ပါ အဖွဲ့၏ကိုးစားယုံကြည်မှုရှိရန် အထူး လိုအပ်လှသည်။ အချို့ဦးစီးများသည် အရည်အချင်းများစွာရှိသော်လည်း ပဲ့စီးနေရာကိုရောက်မလာသည်များလည်း ရှိသည်ဟုသိရသည်။ ပိုက်ကြီးဆွဲလုပ်ငန်းတွင် ဦးစီးသည်လည်းမရှိမဖြစ်သည့်နေရာတွင်ပါဝင်ပြီး လုပ်သားအင်အားစုံညီစွာလုပ်ကိုင်နိုင်မှသာ အောင်မြင်ဖြစ်ထွန်း သည့် လုပ်ငန်းဖြစ်သည်ကိုတွေ့ရသည်။

ပိုက်ကြီးဆွဲသူများ

  နှစ်စဉ် သီတင်းကျွတ်လ မှ တန်ခူးလအထိ ခုနှစ်လတာကာလအတွင်း လုပ်ကိုင်ဆောင်ရွက်ရခြင်းဖြစ်ပြီး တစ်လလျှင် ရက် ၂၀ ခန့်သာ ပင်လယ်သို့ပိုက်လှေထွက်သည်ကိုတွေ့ရသည်။ အဓိကအားဖြင့် လမိုက်ရက်များတွင် မီးအားကောင်းကောင်းအသုံးပြုပြီး ငါးဖမ်းခြင်း ဖြစ်သည်။ လဆန်း ၇ ရက်မှလဆုတ် ၇ ရက်အတွင်းသည် အလင်းရောင်ရရှိမှု နည်းသည့်အတွက် မပျက်မကွက်ပင်လယ်ထွက်ကာ လုပ်ကိုင် ဆောင်ရွက်ရလေ့ရှိသည်။ သီတင်းကျွတ်၊တန်ဆောင်မုန်းလများတွင် ငါးကုန်းညို၊ငါးဝိုင်း၊ပြည်ကြီးငါး စသည့်ငါးများ အဓိကဖမ်းဆီးရမိပြီး တန်ခူး၊ကဆုန်လတို့တွင် ငါးနီတူပေါများစွာရတတ်သည်ဟုသိရသည်။ ပိုက်တစ်ရက်ထွက်လျှင် တင်းပေါင်း ၁၀၀ မှ ၂၀၀ အတွင်း ငါးများ ရရှိပြီး ငါးနီတူတစ်တင်းကိုအခြောက်လှန်းလျှင် ၅ ပိဿာအလေးချိန်ထွက်သည် ဟု လေ့လာသိရှိရသည်။  လဆန်း ၁၃ ရက်မှ လပြည့်ကျော် ၄ ရက်နေ့များသည် အလင်းရောင်ကောင်းစွာရှိနေသေးသည့်အတွက် လုပ်သားများ အနားရသည့်နေ့ရက်များဖြစ်ကာ    အခြားလုပ်ငန်း များကို သွားရောက်လုပ်ကိုင်နိုင်ခွင့်လည်းရရှိကြသည်။ လုပ်ငန်းလုပ်ရမည့် နေရက်များတွင် လုပ်သားများသည်ပိုက်ကြီးတဲသို့ မပျက်မကွက် ပြန်လာ၍ မိမိတို့ထမ်းရွက်ရမည့်တာဝန်များကို ထမ်းဆောင်ကြသည်ကို တွေ့ရသည်။ ပိုက်ကြီးဆွဲလုပ်ငန်းလုပ်ကိုင်နေရင်းဖြင့် မျှင်ရာသီ ဖြစ်သော နတ်တော်၊ ပြာသို၊ တပို့တွဲလများတွင် နေ့ခင်းချိန်၌ ပင်လယ်ထွက်၍မျှင်ဖမ်းနိုင်ကြသည်။ ရရှိလာသောမျှင်များကို တစ်တင်း တစ်သောင်းနှုန်းဖြင့် ပိုင်ရှင်မှပြန်လည်ဝယ်ယူပေးသည်။ ၀ယ်ထားသောမျှင်များကို လှမ်းခြင်း၊ ရုတ်ခြင်း၊ အိတ်သွပ်ခြင်း ကိစ်္စများကို အမျိုးသမီးလုပ်သားများက တစ်တင်းလျှင် ၅၀၀ ကျပ်ဖြင့် အခစားလုပ်ကိုင်ကြသည်ကိုတွေ့ရသည်။ ဆက်လက်၍ ငပိအဖြစ်ကြိတ်ခွဲခြင်း၊ မြို့သို့ တင်ပို့ရောင်းချခြင်းများကို အဆင့်ဆင့်လုပ်ကိုင်ကြရသေးသည်။ (ငပိပြုလုပ်ခြင်း နှင့် ဖြန့်ဖြူးရောင်းချခြင်းများကို ကျြငညနျြေါဖေငညန သြလနာဘနမ ၂၀၁၀ တွင် တိမ်ခိုးမျှင် ဆောင်းပါးဖြင့် စာရေးသူ ရေးသားတင်ပြထားသည်ကို လေ့လာနိုင်ပါသည်။)

ပင်လယ်တွင်းသို့ငါးများရှာဖွေရန် သွားရပြီဆိုသည်နှင့် ဦးစွာ ပိုက်များကိုလှေပေါ်သို့ စနစ်တကျခေါက်တင်ရပြီး ညမှောင်ချိန်၌ မီးလှေနှင့် ပိုက်လှေနှစ်စီးစလုံးသည် ကမ်းမှစတင်ထွက်ခွါရသည်။ ရေအနက်သို့ရောက်အောင် စက်ကိုမောင်းသွားရ၍ ဦးစီးညွန်ကြားသော နေရာရောက်လျှင် လှေကိုရပ်နားရကာ မီးလှေသည်ခပ်လှမ်းလှမ်းတွင်နေရာယူရသည်။ လှေနှစ်စင်းလုံးမှလုပ်သားများသည် ညနက်လာမည့် အချိန်ကိုရောက်အောင် စောင့်ရမည်ဖြစ်သောကြောင့် အဆင်ပြေသလိုအနားယူနေနိုင်ပြီဖြစ်သည်။ လှေဝမ်းပိုက်သည် သူတို့၏အိပ်ယာ ဖြစ်ပြီး ပင်လယ်လှိုင်းပုတ်သံများက သူတို့ကိုချော့သိပ်ပေးနေသည့်ပုံဖြစ်သည်။ နေ့အမှောင် လုံးလုံးကွယ်ပျောက်သွားပြီဆိုသည်နှင့် မီးလှေ ပဲ့စီးသည် သူ၏တာဝန်ကို စတင်ထမ်းဆောင်ရတော့သည်။ မီးလှေပေါ်တွင်တပ်ဆင်ထားသောအလင်းအားကောင်းသည့် ဆလိုက်မီးများကို စတင် မောင်းနှင်ဖွင့်လှစ်ရခြင်းဖြစ်သည်။ ဆလိုက်မီးဖွင့်သည့်နေရာတွင် မီးလင်းလျှင်ပြီးရော ဖွင့်၍မရသေးသည်ကိုတွေ့ရသည်။ အတွေ့ အကြုံ၊ ပညာဖြင့် ဆလိုက်ကိုဖွင့်ရခြင်းဖြစ်သည်။ မီးစက်ကိုအသာမောင်းရပြီး ဆလိုက်ကို လှေနှင့်ဝေးရာသို့ဖျော့ဖျော့ထိုးပေးထားရသည်။ ရုတ်တရက်ဆူညံသံများနှင့် စူးရှသောအလင်းရောင်ကြောင့် ငါးများလန့်ပြေးသွားမည် စိုးရသောကြောင့် မသိမသာ အလင်းရောင်ပေးသည့် ပုံစံဖြစ်သည်။  မီးလှေ၏ လှမ်းသောနေရာတွင် ဆလိုက်ကိုဖျော့ဖျော့လေးပေးပြီး ရောက်လာမည့်ငါးကိုစူးစမ်းရသော မီးလှေဆရာ၏ အလုပ်သည်လည်း အတော် စိတ်ရှည်ရသည့်အလုပ်ဖြစ်သည်။ မီးဆလိုက်ကို ဖျော့ပေးထားရာမှ ငါးအုပ်အခြေအနေအထူအပါးကိုခန့်မှန်းပြီး မီးရောင်ကို တိုးမြင့်ပေးရသည်။ မီးကိုဆက်တိုက်ပေးထားရသည်ဖြစ်သောကြောင့် မီးလုံးကျွမ်းသွားခြင်းမရှိစေရန် ကျွမ်းသွားပါက နောက် တစ်လုံးဖြင့် အားဖြည့်ထားနိုင်ရန် ဆလိုက်မီးသီးများကို လိုအပ်သည်ထက်ပို၍တပ်ဆင်ထားကြရသည်။ ငါးအုပ်ထူထပ်စွာရောက်လာပါက မီးဆရာသည် မီးရောင်ကို မိမိတို့လှေနှစ်စီးကြား (သို့မဟုတ်) လှေနှင့်အနီးဆုံးနေရာသို့ရောက်အောင် ဖြည်းဖြည်းခြင်းဆွဲယူရသည်။ ထိုသို့ ဆွဲယူရာတွင် သိသိသာသာမဟုတ်ဘဲ ငြင်ငြင်သာသာရွှေ့ရခြင်းဖြစ်သည်။ ရုတ်တရက်ကြီးမီးရောင်ကိုဆွဲလိုက်လျှင် ငါးများလန့်ပြေးသွားမည် ဖြစ်သောကြောင့် ထိုကဲ့သို့ ဂရုတစိုက်လုပ်ရခြင်းဖြစ်သည်။ ငါးမိနစ်တစ်ခါ၊ ဆယ်မိနစ်တစ်ခါမှ မီးကို မသိမသာဆွဲရသောကြောင့် ထိုအခိုက် အတန့်သည် မီးဆရာအတွက် များစွာစိတ်လှုပ်ရှားစရာကောင်းနေချိန်လည်းဖြစ်သည်။ ဆလိုက်မီးရောင်သည် လှေနှင့်အနီးဆုံးကပ်လာပြီ ဆိုသည်နှင့် မီးရောင်ကြောင့်ရောက်ရှိနေသာငါးများကို မျက်ဝါးထင်ထင်မြင်နေရပြီဖြစ်သည်။ အချို့ငါးများဆိုလျှင် မြူးတူးပျော်ရွှင်စွာဖြင့် ရေပေါ်သို့ခုန်ပျံနေခြင်း၊ ကိုယ်တစ်ခြမ်းရေပေါ်ဖော်ကာ ကူးခပ်နေကြခြင်းများကို တွေ့ရသည်။

ရေအောက်တွင် လုံးထွေးရောက်ရှိနေသော ငါးများ၏အနေအထားကို မီးဆရာသည်ခန့်မှန်းပြီး တစ်ဖက်မှပိုက်လှေကို သတင်း ပို့ရသည်။ ပိုက်လှေတွင်လုပ်သားများသည် အနားယူအိပ်စက်နေသော်လည်း မီးလှေနှင့်အဆက်အသွယ်လုပ်ရန် လုပ်သားတစ်ဦးသည် အစောင့်တာဝန်ကိုယူထားရသည်ဖြစ်သောကြောင့် မီးဆရာ၏သတင်းပို့မှုကို သိရှိရခြင်းဖြစ်သည်။ သတင်းပို့ရာတွင် အော်ဟစ်ပြောဆိုခြင်းမျိုး မလုပ်ရဘဲ မီးရောင်၊ တက်ရောင်ဖြင့် အချက်ပေးရခြင်းဖြစ်သည်။ မီးဆလိုက်တစ်လုံးကို ဖွင့်ချည်ပိတ်ချည်ဖြင့်အချက်ပြခြင်း၊ အားကောင်း သော လက်နှိပ်ဓာတ်မီးဖြင့် ပိုက်လှေဘက်သို့လှမ်းထိုးပြခြင်း၊ မီးဆလိုက်ရှေ့တွင်တက်မကို ဘယ်ညာလှည့်ပြ၍ မှန်ထိုးသကဲ့သို့ အချက်ပြခြင်း များသည် ပိုက်ကြီးဆွဲရာတွင်အသုံးပြုရသည့် အချက်ပြစနစ်များဖြစ်သည်။ ရေလှိုင်းပုတ်သံများကြားတွင် တဖက်လှေမှအစောင့်ကြားအောင် အော်ရမည်ဆိုလျှင်လည်း အောက်တွင်ရောက်နေသောငါးများကို မောင်းထုတ်သလိုဖြစ်နေမည်စိုးသောကြောင့် အချက်ပြစနစ်ကို သုံးရခြင်း ဖြစ်သည်။ အစောင့်လုပ်သားသည် မီးဆရာထံမှ သတင်းရသည်နှင့်တပြိုင်နက် လှေဦးစီးနှင့်ပဲ့စီးခေါင်းဆောင်တို့ကို နှိုးရသည်။ ဦးစီးနှင့် ခေါင်းဆောင်တို့က မီးလှေနားတွင်ရောက်နေသာ ငါးအုပ်၏အခြေအနေကို အသေအချာအကဲခပ်ရသည်။ ငါးအုပ်ထူသည်၊ ရမည့်ငါး အလေးချိန်များနိုင်သည်ဟု ခေါင်းဆောင်နှစ်ဦးမှ တွက်ချက်ခန့်မှန်းမိလျှင် လှေအဖွဲ့မှလုပ်သားအားလုံးကိုနှိုးပြီး ပိုက်ဖြင့်ဝိုင်းရန်အတွက် စတင်လုပ်ကိုင်ရတော့သည်။ ရောက်ရှိနေသောငါးအုပ်ပါးသည်ဆိုလျှင် လုပ်သားများကိုမနှိုးဘဲ ငါးအုပ်အခြေအနေကို ဆက်၍စောင့်ကြည့် နေရသည်။ တစ်ချို့ရက်များတွင် ငါးအုပ်စောင့်ကြည့်ရင်းဖြင့် မိုးလင်းသွားခြင်းများပင်ရှိသည်။ ရရှိမည့်ငါးနှင့် စိုက်ထုတ်ရမည့်လူအင်အားကို ခေါင်းဆောင်များက ချင့်ချိန်နေရသောကြောင့်ဖြစ်သည်။ ငါးအချိန်တစ်ဆယ်ကိုဆွဲရခြင်းနှင့် အချိန်တစ်ရာကိုဖမ်းဆီးရာ၌ အသုံးပြုရသော လုပ်သားအင်အားသည် အတူတူပင်ဖြစ်သည်။ ပိုက်ကြီးတစ်ဖွဲ့လုံးစာ တွက်ခြေကိုက်နိုင်မည့်အနေအထားဖြစ်နိုင်လျှင်တော့ ပဲ့စီးသည် လှေလုပ်သားများကို တစ်ယောက်မကျန် အမြန်ထခိုင်းမှာသေချာပါသည်။

ငါးအုပ်ကိုဖမ်းဆီးမိနိုင်ရန်အတွက် ပိုက်လှေသားများသည် ငါးအုပ်၏အပြင်ဘက်မှနေ၍ ပိုက်ထိတ်စကိုချပြီး ဂငယ်ပုံသဏ္ဍာန် ၀ိုင်းပတ်ရခြင်းဖြစ်သည်။ ပဲ့စီးက တက်မကိုလိုရာထိန်းပေးနေချိန်၌ လှေဦးမှနေသော ဦးစီးက ငါးအုပ်ကိုမျက်ခြေမပြတ်ကြည့်နေပြီး ပိုက်အဖွဲ့ကို လိုအပ်သလိုညွှန်ကြားပြသပေးရသည်။ ပိုက်ဆရာနှစ်ယောက်နှင့် သူ၏အဖွဲ့သားများက တက်ညီလက်ညီဖြင့် ပိုက်များကို အလိုက်သင့်ရေထဲသို့ချသွားကြရသည်။ ပဲ့စီးနားတွင်ကပ်လျှက် စက်ကိုထိန်းရသော စက်ဆရာက ပဲ့စီး၏ညွှန်ကြားချက်အတိုင်း စက်ကို အတင်အလျော့လုပ်ပေးရသည်။   မီးလှေမှ မီးဆရာကလည်း ဆလိုက်မီးများကို အဆုံးရောက်သည်အထိ အလင်းရောင်မြှင့် ဖွင့်ပေးထားပြီး ငါးများကို မြှူဆွယ်ထားရသည်။ မီးလှေတွင် တက်မကိုင်၊ စက်မောင်း၊ ဆလိုက်ထိန်း စသည်ဖြင့် အကူလုပ်သားများရှိသည်ြ့ဖစ်သောကြောင့် မီးဆရာ၏လိုအပ်သည်များကို ကူညီလုပ်ကိုင်ပေးရသည်။ ပိုက်လှေမှငါးအုပ်ကို တစ်ပါတ်ပြည့်အောင် ပိုက်ဖြင့်ဝိုင်းပတ်မိပြီဆိုသည်နှင့် မီးလှေသည် ဆလိုက်မီးရောင်ကို ပုံမှန်အနေအထားသို့ပြန်လျှော့ကာ ပိုက်လှေဖက်သို့ရွှေ့၍ အလင်းရောင်ပေးရသည်။ မီးဆရာ၏ အဖွဲ့ များသည် ပိုက်လှေအဖွဲ့ကိုကူညီပြီး ရေအောက်မှဝိုင်းပိုက်ကိုဆွဲတင်ပေးကြသည်။ မည်သူမျှခိုကပ်နေခြင်းမရှိပဲ မိမိတို့လုပ်ရမည့် တာဝန်ကို ဦဆောင်သူများ၏ညွှန်ကြားချက်အတိုင်း အားသွန်စိုက်၍လုပ်ကိုင်ဆောင်ရွက်ကြသည်ကိုတွေ့ရသည်။

အလင်းရောင်လုံးဝကုန်ဆုံးသွားချိန်မှ စတင်လုပ်ကိုင်ဆောင်ရွက်ရသည်ဖြစ်ပြီး ငါးအုပ်များထူထပ်လာသည်အထိ စောင့်ဆိုင်း လုပ်ကိုင်ရသည်ဖြစ်သောကြောင့် အချိန်များစွာကြာမြင့်သည်။ တစ်ညလုံးနီးပါး ငါးအုပ်ကိုစောင့်ဆိုင်းဖမ်းဆီးပြီးနောက် ကမ်းသို့ပြန်ရောက် ချိန်သည် မနက်အလင်းရောင် ရောက်ရှိနေပြီဖြစ်သည်။ မီးဖြင့်မျှားပြီးရရှိလာသောငါးများမှာ များသောအားဖြင့် ငါးနီတူ၊ ငါးကုန်းညို၊ ငါးဝိုင်း၊ ပြည်ကြီးငါး စသည်များဖြစ်ကြသည်။ ငါးနီတူမှာအများဆုံးရရှိတတ်ပြီး  ဈေးကောင်းသောကြောင့် ပိုက်သမားများကလည်း ငါးနီးတူကို ဦးစားပေးဖမ်းဆီးလုပ်ကိုင်ကြသည်ကိုတွေ့ရသည်။ ပိုက်အဖွဲ့သည်ကမ်းခြေပြန်ရောက်သည်နှင့် ဖမ်းဆီးရမိလာသောငါးများကို စောင့်ဆိုင်း နေသည့် အလုပ်သမများလက်ဝယ်သို့တင်ပို့ပေးရသည်။ ပိုက်တောင်းကြီးများတွင်ငါးများကိုထည့်ကာ ငါးလှမ်းသည့်စင်ပေါ်သို့ ထမ်းတင် နေကြသည့် ပိုက်ကြီးတဲလုပ်သားများ၏ လုပ်ငန်းခွင်သည် ပင်လယ်ကမ်းခြေဒေသ၏ မရိုးနိုင်သောမြင်ကွင်းတစ်ခု ဖြစ်နေသည်။ ငါးရုတ် သမများ ကလည်း လှေသမားများရရှိလာသောငါးများကို  အမျိုးအစားခွဲပြီး ခွဲလှမ်းရမည့်ငါးများကို ငါးခုတ်စင်ပေါ်ပို့၍ ကျန်သည် များကို ပိုက်စိမ်းများခင်းထားသည့်စင်များပေါ်သို့ စနစ်တကျဖြန့်ခင်းပေးကြရသည်။ တစ်နေမှနှစ်နေ၊ နှစ်နေမှသုံးနေအထိ ခြောက်သွေ့စေရန် ငါးခြောက်ဖြစ်စေရန်လှမ်းကြရပြီး စနစ်တကျထုတ်ပိုးကာ မြို့သို့ ဆက်လက်တင်ပို့ရောင်းချရဦးမည်ဖြစ်သည်။ မိုးလွတ်သော ရာသီနှင့် ကြုံလျှင်  ငါးခြောက်လှမ်းခြင်းကို လုပ်ကိုင်နိုင်သော်လည်း နေရောင်ကောင်းစွာမရသည့် အချိန်မျိုးနှင့်ကြုံမည်ဆိုပါက ငါးဆားနယ် (ငါးဆားမာ) လုပ်ကိုင်ကြသည်ဟုသိရသည်။ ရောင်းတန်းမ၀င်သောငါးများ၊ နာနေသောငါးများ နှင့် ငါးခေါင်းများကို မွေးမြူရေး သမားများ အတွက် ကြက်စာ၊ ဘဲစာအဖြစ် ပြန်လည်ရောင်းချကြသည်။ ပိုက်ကြီးတဲလုပ်သားများမှ  ဖမ်းဆီးရရှိလာသော ငါးများကို လုပ်ငန်းပိုင်ရှင်မှ ပြန်လည်ဈေးဖြတ်ဝယ်ယူပေးသည်။ ငါးနီတူတစ်ပိဿာဒေသပေါက်ဈေး ၂၀၀၀ ၀န်းကျင်ရှိသည်။ အစိမ်းအတိုင်းရောင်းမည်ဆိုပါက ငါးနီတူ ကို ဆိုက်ကြီး၊ လတ်၊ သေး ဟူ၍ သုံးမျိုးခွဲကာ အကြီးတစ်တင်း ၉၀၀၀၊ အလတ် ၆၀၀၀၊ အသေး ၄၀၀၀၊ ငါးကုန်းညိုနှင့်ငါးဝိုင်းကိုမူ ဆိုဒ်မခွဲဘဲ ငါးကုန်းညို တစ်တင်း ၄၀၀၀၊ ငါးဝိုင်း ၂၅၀၀၀  ဈေးနှုန်း သတ်မှတ်ရောင်းဝယ်လုပ်ကိုင်ကြသည်။  ပွဲရုံများ၏ဈေးကို ပိုင်ရှင်မှ စူးစမ်း၍ ဒေသတွင်ဈေးဖွင့်ပေးခြင်းဖြစ်ပြီး မြို့သို့တင်ပို့ချိန်တွင်ရှိနေသော ကုန်ဈေးနှုန်းသည် ပိုင်ရှင်လုပ်သူ၏ ကံကြမ်္မာဖြစ်သည်ဟု သတ်မှတ်ကြသည်။ များသောအားဖြင့် ဈေးဖွင့်ထားသောနှုန်းထက် ပွဲရုံက ပြန်ကောက်သောဈေးသည် ပို၍များပါသည်။ မြို့သို့ တင်ပို့ ရာတွင် သင်္ဘောကိုအများဆုံးအသုံးပြုပြီး ပိဿာလေးဆယ်ဆန့် ငါးအိတ်တစ်အိတ်လျှင် တန်ဆာခ ၃၀၀ ကျပ်ပေးကြရသည်။ ပင်လယ် ဒေသမှ ငါးခြောက်နှင့်ငါးဆားမာများကို ရန်ကုန်ပွဲရုံများသို့ အဓိကပို့ဆောင်ကာ ကျန်ပြည်နယ်နှင့်တိုင်းများ အရောက် ဆက်လက်ဖြန့်ဖြူး ရောင်းချပေးလျက်ရှိသည် ဟု လေ့လာသိရှိရသည်။

ပိုက်ကြီးဆွဲလုပ်ငန်းသည် နှစ်ပတ်လည်အောင်လုပ်နေရသည့် လုပ်ငန်းမဟုတ်သောကြောင့် လုပ်ငန်းရပ်နားချိန်တွင် လုပ်သားများ သည် အခြားအသက်မွေးဝမ်းကြောင်းလုပ်ငန်းများနှင့် တစ်နိုင်ငါးဖမ်းလုပ်ငန်းလုပ်ငန်းများကို ဆက်လက်လုပ်ကိုင်ကြရသည်။ လုပ်ငန်းသိမ်း ကြပြီဆိုသည်နှင့် ပိုက်လျှော်ဖွတ်ခြင်းကိုမဖြစ်မနေလုပ်ပေးရသေးသည်။ ပိုက်များကိုရေငန်ဆက်တိုက်ထိထားသောကြောင့် ဤအတိုင်း ထားလိုက်လျှင် ဆွေးရိသွားမည်ဖြစ်သဖြင့် ရေငန်စင်ကြယ်သွားစေရန် လျှော်ဖွတ်ဆေးကြောပေးရခြင်းဖြစ်သည်။ လျှော်သည့်ပုံစံမှာ ရေချို ရေငန်စပ်သည့် နေရာ၊ ရေချိုသည့် နေရာသို့ပိုက်လှေကိုမောင်းယူသွားရပြီး ပိုက်များအားလုံးကိုရေထဲသို့တစ်နာရီကျော်ခန့်ချ၍ စိမ်ထားရသည်။ ပြီးလျှင် ပိုက်ကိုဆွဲဖော်ကာ ရေစစ်အောင်ထား၍ စနစ်တကျခေါက်သိမ်းထားရခြင်းဖြစ်သည်။  ရေချိုသည့်နေရာနှင့် များစွာ ဝေးနေလျှင် တန်းထိုး၍ ပိုက်ကိုဖြန့်တင်ကာ ရေချိုလောင်းပြီးပိုက်ကိုလျှော်ကြရသည်။ ပိုက်တွင်ကပ်နေသော ရေငန်ဓာတ်ကိုပြယ်သွားစေရန် ရေချိုလောင်းလျှော်ခြင်းကို လုပ်ငန်းသိမ်းပြီ ဆိုသည်နှင့် ပိုက်ကြီးဆွဲလုပ်ငန်းတိုင်း လုပ်ကိုင်ဆောင်ရွက်ကြရသည်ကိုတွေ့ရသည်။ ပိုက်နားချိန် များတွင် ပိုက်ဆက်၊ ပိုက်ဖာ လုပ်တတ်သူ များကို လုပ်ငန်းရှင်က အခစားနှင့် ပေါက်ပြဲသွားသည့်ပိုက်များဖာထေးပေးရန် ငှားရမ်း လုပ်ကိုင် စေခြင်းများလည်းရှိသည်။ ၀ါဆို၊ ၀ါခေါင်၊ တော်သလင်းသုံးလသည် ပိုက်ဖာပိုက်ဆက်သည့်လုပ်ငန်းကို လုပ်ကိုင်ရသည့်အချိန်များဖြစ်ကာ ပိုက်တစ်ဖောင် ပြုပြင်ပေးခြင်းလုပ်ခအဖြစ် လေးယောက်တစ်ဖွဲ့လျှင် ငွေကျပ်လေးသိန်းခွဲခန့်ရရှိကြသည်။  

နောင်တစ်နှစ် ပိုက်ကြီးဆွဲရာသီ ရောက်ပြီဆိုသည်နှင့် ပိုက်ခေါင်းဆောင်၊ ဦးစီး၊ ပိုက်ဆရာ၊ မီးလှေဆရာ အပါအ၀င် သူတို့၏ အဖွဲ့သားများသည် ပိုက်ကြီးတဲသို့ ရောက်လာကြဦးမည်ဖြစ်သည်။ ဆက်လက်၍ ပိုက်ဆင်ခြင်း၊ ဆလိုက်မီးများထိုး၍ ငါးကိုမျှားခြင်း၊ တက်ညီလက်ညီ ပိုက်ကိုဆွဲကြခြင်းဖြင့်  လုပ်ငန်း တာဝန်များကိုကြိုးပမ်းလုပ်ကိုင်ကြကာ ပင်လယ်ကမ်းခြေဒေသ၏ မပြီးဆုံးသေးသော ဇာတ်လမ်းတစ်ပုဒ်ကို ၀ိုင်းဝန်းရေးဖွဲ့ကြဦးမည် ဖြစ်ပါကြောင်းဖြင့် ပင်လယ်ကမ်းနားမှ ပိုက်ကြီးဆွဲသူများအကြောင်းကို လေ့လာမိသမျှ ရေးသား တင်ပြလိုက်ပါသည်။

( ဤဆောင်းပါးရေးသားနိုင်ရေးအတွက် အစစအရာရာအကူအညီပေးပါသော ဧရာဝတီတိုင်းဒေသကြီး၊ ပုသိမ်ခရိုင်၊ ငရုတ်ကောင်း မြို့နယ်ခွဲ ပန်းမော်ကျေးရွာမှ  ရေလုပ်သားကြီး ဦးကျော်မိုးသက် အား အထူး ကျေးဇူးတင်ရှိပါသည်။ )